రంగారెడ్డి జిల్లా చేవెళ్ల మండల పరిధిలో కలకలం రేగింది. కమ్మెట గ్రామ శివారులోని ప్రముఖ ‘ఎల్జీ (LG) ఫామ్హౌస్’లో కొందరు యూనివర్సిటీ విద్యార్థులు గుట్టుచప్పుడు కాకుండా నిర్వహిస్తున్న భారీ పార్టీని స్పెషల్ ఆపరేషన్ టీమ్ (ఎస్‌వోటీ) మరియు స్థానిక చేవెళ్ల పోలీసులు సంయుక్తంగా భగ్నం చేశారు.పోలీసులు తెలిపిన ప్రాథమిక వివరాల ప్రకారం.. శంకరపల్లి మండలం దొంతన్‌పల్లి పరిధిలోని ‘ఐబీఎస్ ఇక్ఫాయ్ (IBS IFHE) యూనివర్సిటీ’కి చెందిన బీబీఏ, ఇంజనీరింగ్ విభాగాల విద్యార్థులు ఈ ఫామ్‌హౌస్‌లో పార్టీ ఏర్పాటు చేసుకున్నారు. సమాచారం అందుకున్న ఎస్‌వోటీ బృందాలు, చేవెళ్ల పోలీసులు ఒకేసారి ఫామ్‌హౌస్‌పై ఆకస్మిక దాడి నిర్వహించారు. దాడి సమయంలో సుమారు 40 మందికి పైగా విద్యార్థులు అక్కడ ఉన్నట్లు, వారిలో దాదాపు 20 నుంచి 25 మంది యువతులు కూడా ఉన్నట్లు సమాచారం.
పోలీసులను చూడగానే విద్యార్థులు పరుగులు తీసే ప్రయత్నం చేయగా, సిబ్బంది అందరినీ చుట్టుముట్టి అదుపులోకి తీసుకున్నారు. అనంతరం వారిని చేవెళ్ల పోలీస్ స్టేషన్‌కు తరలించి వివరాలు సేకరిస్తున్నారు. ఈ పార్టీలో మద్యం ఏమైనా అక్రమంగా సరఫరా చేశారా? లేక నిషేధిత మత్తు పదార్థాలు (డ్రగ్స్) ఏవైనా వినియోగించారా? అనే కోణంలో పోలీసులు లోతుగా ఆరా తీస్తున్నారు. ఫామ్హౌస్ యజమాని అనుమతులు, పార్టీ నిర్వాహకుల వివరాలపై ఎస్‌వోటీ ఆరా తీస్తోంది. విద్యాసంస్థల సమీపంలో మరియు శివారు ఫామ్‌హౌస్‌లలో ఇలాంటి చర్యలకు పాల్పడితే కఠిన చర్యలు తప్పవని అధికారులు హెచ్చరించారు. ఈ ఘటనపై పూర్తి వివరాలు తెలియాల్సి ఉంది.
