Maharashtra Tragedy: మహారాష్ట్ర రాయ్‌గఢ్ జిల్లాలోని దివేగర్ బీచ్‌లో తీవ్ర విషాదం చోటుచేసుకుంది. పూణేలోని అలందీకి చెందిన ఓ ప్రైవేట్ కోచింగ్ సెంటర్‌కు చెందిన విద్యార్థులు గురువారం విహారయాత్రకు వెళ్లారు. సముద్రంలో ఈతకు దిగి 8 మంది విద్యార్థులు నీటిలో కొట్టుకుపోయారు. ఈ టూర్‌కు మొత్తం 48 మంది టీమ్ వెళ్లింది. ఇందులో 25 మంది బాలురు, 17 మంది బాలికలు ఉన్నారు. వీరంతా పూణేలోని విన్నర్ అకాడమీలో 11,12 తరగతులకు కోచింగ్ తీసుకుంటున్నారు. చనిపోయిన వారు 16 ఏళ్ల వారని అధికారులు చెప్పారు.
విద్యార్థులు దివేగర్ లోని దిఘి సాగరి ప్రాంతానికి చేరుకున్న తర్వాత బీచ్‌లో ఈతకు దిగారు. ఆ సమయంలో అలలు, ప్రవాహం బలంగా ఉండటంతో 8 మంది సముద్రంలో కొట్టుకుపోయింది. నీటి లోతు, ప్రవాహ తీవ్రతను అంచనా వేయలేకపోవడంతో పెను విషాదం జరిగినట్లు అధికారులు చెబుతున్నారు. విద్యార్థులు కొట్టుకుపోయిన వెంటనే స్థానికులు, పోలీసులు రెస్క్యూ చర్యలు ప్రారంభించారు.
చాలాసేపటి తర్వాత 8 మంది మృతదేహాలను ఒడ్డుకు తీసుకువచ్చారు. మృతుల్లో తన్మయ్ దత్తాత్రయ్ వహిలే, సుమిత్ భారత్ అహిరే, ప్రణవ్ రామ్‌దాస్ బన్సోడే, కైవల్య సతీశ్ వాసంకర్, రాజ్‌వీర్ యువరాజ్ వహిలే, యశ్ కిరణ్ వాంఖడే, సోహమ్ తుకారాం భాండ్వల్కర్, కౌస్తుభ్ సందీప్ దౌండ్ ఉన్నట్లు నివేదికలు పేర్కొన్నాయి. ఘటనపై మహారాష్ట్ర సీఎం దేవేంద్ర ఫడ్నవీస్ విచారం వ్యక్తం చేశారు. మరణించిన వారి కుటుంబ సభ్యులకు సంతాపం తెలియజేశారు.
