CJP Protest: ముంబైలో కాక్రోచ్ జనతా పార్టీ(CJP) నిర్వహించిన నిరసన కార్యక్రమంపై పోలీస్ యాక్షన్ మొదలైంది. నిరసన నిర్వాహకులతో పాటు 400-500 మంది గుర్తుతెలియని సీజేపీ మద్దతుదారులు, నిరసనకారులపై ఎఫ్ఐఆర్ నమోదు చేశారు. శివాజీ పార్క్ పోలీస్ స్టేషన్‌లో ఈ కేసులు నమోదైనట్లు ముంబై పోలీసులు తెలిపారు. భారతీయ న్యాయ సంహిత (BNS)లోని సెక్షన్లు 189, 223, అలాగే మహారాష్ట్ర పోలీస్ చట్టంలోని సెక్షన్లు 37(1)(3), 135 కింద కేసు నమోదు చేసినట్లు అధికారులు తెలిపారు.
శివాజీ పార్క్‌లో అనుమతి లేకున్నా నిరసన కార్యక్రమాన్ని నిర్వహించడంపై పోలీసులు ఈ కేసులు నమోదు చేశారు. ఇదిలా ఉంటే, సీజేపీ నిరసనల్లో మైనర్ పిల్లల్ని ‘‘రక్షణ కవచాలు’’గా ఉపయోగించడంపై విమర్శలు వస్తున్న నేపథ్యంలో, జాతీయ మానవ హక్కుల కమిషన్ (NHRC) సుమోటోగా స్పందించింది. ఈ అంశంపై ముంబై పోలీస్ కమిషనర్, ఎలక్ట్రానిక్స్ అండ్ ఇన్ఫర్మెషన్ టెక్నాలజీ మంత్రిత్వ శాఖ, మహారాష్ట్ర మహిళా మరియు శిశు అభివృద్ధి శాఖలకు నోటీసులు జారీ చేసింది. మైనర్లను ప్లాన్ ప్రకారం ఉపయోగించుకున్నారా? అనే దానిపై విచారణ చేయాలని ఆదేశించారు.
