Vaibhav Sooryavanshi-Brett Lee: వైభవ్ సూర్యవంశీ నిజంగానే 15 ఏళ్ల కుర్రాడా? ఆ కుర్రాడు చూపుతున్న ఫామ్, మైదానంలో ఆడుతున్న తీరు, అద్భుతమైన ఆత్మవిశ్వాసం చూస్తుంటే.. అతడి వయసు 28 లేదా 30 ఏళ్లు ఉన్న అనుభవజ్ఞుడైన క్రికెటర్లా అనిపిస్తోంది! ఇంత చిన్న వయసులోనే క్రికెట్ ప్రపంచాన్ని తన వైపు తిప్పుకున్న ఈ కుర్రాడి ప్రదర్శన అందరినీ ఆశ్చర్యపరిచింది. గడిచిన ఏడాది కాలంలో వైభవ్ వయసుపై వస్తున్న ప్రశ్నలు కొంత తగ్గినప్పటికీ, విదేశాల్లో మాత్రం ఈ యువ సంచలనం వయసు గురించిన చర్చలు ఇంకా సాగుతూనే ఉన్నాయని ఆస్ట్రేలియా దిగ్గజ బౌలర్ బ్రెట్ లీ వెల్లడించారు.
ప్రపంచ అత్యుత్తమ ఫాస్ట్ బౌలర్లలో ఒకరైన బ్రెట్ లీ, ప్రసిద్ధ ‘బీర్ బైసెప్స్’ యూట్యూబ్ ఛానెల్లో మాట్లాడారు. సూర్యవంశీ వయస్సు 15, 16, 17 లేదా 18 ఏదైనా కావొచ్చు.. దానితో ఎవరికీ సంబంధం లేదని తేల్చి చెప్పారు. అత్యున్నత స్థాయిలో క్రికెట్ ఆడగల సామర్థ్యం అతడికి ఉందా లేదా అనేదే ఇక్కడ ముఖ్యమని, అసలైన చర్చ దానిపైనే జరగాలని వ్యాఖ్యానించారు. “అతను నిజంగా అద్భుతం. ప్రపంచవ్యాప్తంగా ఉన్న ప్రతి ఒక్కరూ ‘అతడికి నిజంగా 15 ఏళ్లేనా?’ అని నన్ను అడుగుతున్నారు. ప్రస్తుతం క్రికెట్ వర్గాల్లో ఇదే అతిపెద్ద హాట్ టాపిక్. నాకు అతడి వయసుతో పనే లేదు. అతడికి 15 ఏళ్లు అయితే చాలా సంతోషం.. ఒకవేళ 17 లేదా 18 ఏళ్లు అయినా ఎవరికి నష్టం? ఈ కుర్రాడికి క్రికెట్ బాగా ఆడడం వచ్చు, అదొక్కటే ముఖ్యం! భారత్కు దొరికిన గొప్ప ఆణిముత్యం అతడు. భవిష్యత్తులో మరెన్నో గొప్ప విజయాలు సాధిస్తాడు” అని బ్రెట్ లీ ఆకాశానికెత్తేశారు.
ఐపీఎల్లో అతి తక్కువ సమయంలోనే సూర్యవంశీ అదరగొట్టాడని లీ గుర్తుచేశారు. “సన్రైజర్స్ హైదరాబాద్పై అతడు చేసిన 97 పరుగుల ఇన్నింగ్స్ నన్ను ఎంతో ఆకట్టుకుంది. ఆ మ్యాచ్లో ఆస్ట్రేలియా ఫాస్ట్ బౌలర్లు బంతిని నిప్పుల ముద్దలా విసురుతుంటే, ముక్కు ముందరకు వచ్చిన బంతులను సైతం చాలా సునాయాసంగా హుక్ షాట్లు కొట్టాడు. సరైన క్రికెటింగ్ షాట్లు ఆడుతూ, ఎక్కడి నుంచో అంతటి పవర్ తెచ్చుకుంటున్నాడు. అతని బ్యాటింగ్ లోపాలు కాకుండా కేవలం మనస్తత్వమే (మైండ్) భవిష్యత్తును నిర్ణయిస్తుంది. అతడు ఇంకా చిన్న పిల్లాడే, అతడిని పిల్లాడిగానే ఉండనివ్వండి.. అనవసరమైన ఒత్తిడి పెంచకండి” అని ఆసీస్ మాజీ పేసర్ హితవు పలికారు.
