FIFA World Cup 2026 Round 16: ఫిఫా వరల్డ్ కప్ 2026 టోర్నమెంట్ కీలక దశకు చేరుకుంది. గ్రూప్ దశ పోటీలు, రౌండ్ ఆఫ్ 32 ముగియడంతో ఇప్పుడు సమరం రౌండ్ ఆఫ్ 16కు రంగం సిద్ధమైంది. రౌండ్ ఆఫ్ 16లో ప్రపంచ ఫుట్బాల్ దిగ్గజ జట్లు తలపడనున్నాయి. ప్రతి మ్యాచ్ డూ ఆర్ డై (నాకౌట్) కావడంతో అభిమానుల్లో ఉత్కంఠ నెలకొంది.
రౌండ్ ఆఫ్ 16లో తొలి మ్యాచ్లో కెనడా, మొరాకో జట్లు తలపడనున్నాయి. ఆ తర్వాత పరాగ్వే, ఫ్రాన్స్ మధ్య పోరు జరగనుంది. మరో కీలక మ్యాచ్లో బ్రెజిల్, నార్వే జట్లు పోటీ పడనున్నాయి. ఫుట్బాల్లో ఐదు సార్లు ప్రపంచ కప్ గెలిచిన బ్రెజిల్ మరోసారి టైటిల్ వేటలో ముందుకు సాగాలని లక్ష్యంగా పెట్టుకుంది. అదే రోజు మెక్సికో, ఇంగ్లండ్ జట్ల మధ్య మరో ఆసక్తికర పోరు జరగనుంది. ఇంగ్లండ్ జట్టు తమ దూకుడు కొనసాగించాలని చూస్తుండగా.. మెక్సికో సంచలనం సృష్టించాలని చూస్తోంది.
రౌండ్ ఆఫ్ 16లో అత్యంత ఆసక్తికరమైన మ్యాచ్లలో పోర్చుగల్-స్పెయిన్ పోరు ఒకటి. యూరప్కు చెందిన ఈ రెండు బలమైన జట్లు తలపడటంతో ఈ మ్యాచ్పై భారీ అంచనాలు ఉన్నాయి. అలాగే అమెరికా, బెల్జియం జట్ల మధ్య జరిగే మ్యాచ్ కూడా అభిమానులను ఆకట్టుకోనుంది. ఇక మరోవైపు అర్జెంటీనా, ఈజిప్ట్ జట్లు క్వార్టర్ ఫైనల్ బెర్త్ కోసం పోటీ పడనున్నాయి. గత ప్రపంచ ఛాంపియన్ అర్జెంటీనాకు ఈ మ్యాచ్ కీలకంగా మారింది. ఆ మ్యాచ్ తర్వాత స్విట్జర్లాండ్, కొలంబియా జట్ల మధ్య కూడా హోరాహోరీ పోరు జరగనుంది.
మొత్తంగా చూస్తే.. ఫిఫా వరల్డ్ కప్ 2026 రౌండ్ ఆఫ్ 16లో ప్రతి మ్యాచ్ ఉత్కంఠభరితంగా సాగనున్నట్లు కనిపిస్తోంది. బ్రెజిల్, ఫ్రాన్స్, అర్జెంటీనా, ఇంగ్లండ్, పోర్చుగల్, స్పెయిన్ వంటి ఫుట్బాల్ దిగ్గజాలు బరిలో ఉండటంతో ప్రపంచవ్యాప్తంగా ఫుట్ బాల్ అభిమానుల దృష్టి ఈ నాకౌట్ పోరులపైనే ఉంది. క్వార్టర్ ఫైనల్కు చేరే జట్లు ఏవో తేల్చే ఈ మ్యాచ్లు ఫుట్బాల్ ప్రేమికులకు అసలైన పండుగగా మారనున్నాయి.
