Water Bottle Cleaning: మనం ప్రతిరోజూ ఉపయోగించే ప్లాస్టిక్ వాటర్ బాటిల్ను శుభ్రంగా ఉంచడం చాలా ముఖ్యం. సరైన విధంగా శుభ్రం చేయకపోతే బాటిల్లో బ్యాక్టీరియా, ఫంగస్, దుర్వాసనలు ఏర్పడే ప్రమాదం ఉంటుంది. ముఖ్యంగా జిమ్, ఆఫీస్, స్కూల్ వంటి ప్రదేశాలకు తీసుకెళ్లే బాటిళ్లను ప్రతిరోజూ శుభ్రం చేయడం ఆరోగ్యానికి మంచిది. ఇంట్లో సులభంగా లభించే వెనిగర్, బేకింగ్ సోడా, డిష్ సోప్, బ్లీచ్ వంటి పదార్థాలతో బాటిల్ను ఎలా శుభ్రం చేయాలో ఇప్పుడు చూద్దాం..
వెనిగర్తో శుభ్రం:
వైట్ వెనిగర్ బాటిల్ లోని బ్యాక్టీరియాను తొలగించడమే కాకుండా దుర్వాసనను కూడా పోగొడుతుంది. బాటిల్లో ఐదో వంతు వరకు వైట్ వెనిగర్ పోసి, సగం వరకు గోరువెచ్చని నీటిని నింపాలి. బాటిల్ను బాగా షేక్ చేసి రాత్రంతా అలాగే ఉంచాలి. మరుసటి రోజు ఆ ద్రావణాన్ని పారబోసి గోరువెచ్చని నీటితో బాగా కడగాలి. అవసరమైతే బాటిల్ బ్రష్ లేదా టూత్బ్రష్తో లోపల భాగాన్ని రుద్దాలి. ఆ తర్వాత పూర్తిగా ఆరనివ్వాలి.
బేకింగ్ సోడా:
బాటిల్లో పేరుకుపోయిన మురికిని తొలగించడంలో బేకింగ్ సోడా చాలా ప్రభావవంతంగా పనిచేస్తుంది. నాలుగు కప్పుల గోరువెచ్చని నీటిలో పావు కప్పు బేకింగ్ సోడా కలిపి బాటిల్లో నింపాలి. ఈ మిశ్రమాన్ని రాత్రంతా ఉంచిన తర్వాత బాటిల్ బ్రష్తో లోపల భాగాన్ని శుభ్రం చేయాలి. తర్వాత గోరువెచ్చని నీటితో కడిగి పూర్తిగా ఆరబెట్టాలి.
డిష్ సోప్:
రోజూ బాటిల్ను శుభ్రం చేయడానికి డిష్ సోప్ ఉత్తమ మార్గం. బాటిల్ను సగం వరకు గోరువెచ్చని నీటితో నింపి 3 నుంచి 5 చుక్కల డిష్ సోప్ వేయాలి. మూత పెట్టి సుమారు 30 సెకన్ల పాటు బాగా షేక్ చేయాలి. ఆ తర్వాత సబ్బు నీటిని పారబోసి శుభ్రమైన నీటితో కడగాలి. లోపల మురికి ఎక్కువగా ఉంటే బాటిల్ బ్రష్ లేదా స్పాంజ్తో రుద్దాలి.
డిష్వాషర్లో శుభ్రం:
మీ బాటిల్పై డిష్వాషర్-సేఫ్ గుర్తు ఉంటే దాన్ని డిష్వాషర్లో కూడా శుభ్రం చేయవచ్చు. బాటిల్ మూత, స్ట్రా వంటి భాగాలను విడదీసి డిష్వాషర్ పై ర్యాక్లో ఉంచాలి. వాషింగ్తో పాటు డ్రైయింగ్ సైకిల్ను కూడా ఎంపిక చేస్తే బాటిల్ పూర్తిగా శుభ్రం అవుతుంది.
బ్లీచ్తో డీప్ క్లీనింగ్:
బాటిల్ను పూర్తిగా శానిటైజ్ చేయాలనుకుంటే బ్లీచ్ ఉపయోగించవచ్చు. ఒక భాగం బ్లీచ్కు తొమ్మిది భాగాల నీటిని కలిపి బాటిల్లో పోయాలి. బాటిల్ను షేక్ చేసి లోపలి భాగం మొత్తం తడిసేలా చూడాలి. తర్వాత బ్రష్తో శుభ్రం చేసి, బ్లీచ్ పూర్తిగా తొలగేలా రెండు నుంచి మూడు సార్లు నీటితో కడగాలి. బ్లీచ్ కాస్త విషపూరితమైనది కాబట్టి.. పూర్తిగా తొలగించడం చాలా ముఖ్యం.
డెంచర్ టాబ్లెట్లు:
డెంచర్ క్లీనింగ్ టాబ్లెట్లు కూడా బాటిల్ శుభ్రపరచడంలో ఉపయోగపడతాయి. బాటిల్ను నీటితో నింపి ఒక టాబ్లెట్ వేయాలి. టాబ్లెట్ పూర్తిగా కరిగేందుకు సుమారు 30 నిమిషాలు వేచి ఉండాలి. ఆ తర్వాత ద్రావణాన్ని పారబోసి బ్రష్తో లోపలి భాగాన్ని శుభ్రం చేయాలి. తర్వాత శుభ్రమైన నీటితో కడిగి ఆరబెట్టాలి.
