தி.மு.க வேலூர் தெற்கு மாவட்டச் செயலாளரும் அணைக்கட்டு தொகுதி முன்னாள் எம்.எல்.ஏ-வுமான ஏ.பி.நந்தகுமாரின் காட்பாடி வீட்டில் இன்று காலை முதலே லஞ்ச ஒழிப்புத்துறை போலீஸார் தீவிர சோதனையில் ஈடுபட்டு வருகின்றனர். டி.எஸ்.பி தலைமையிலான 7-க்கும் மேற்பட்ட லஞ்ச ஒழிப்புத்துறை போலீஸார் இந்த சோதனையை நடத்தி வருகின்றனர்.
அணைக்கட்டு தொகுதியில் தொடர்ந்து 2 முறை எம்.எல்.ஏ-வாக இருந்தவர் நந்தகுமார். கடந்த சட்டமன்றத் தேர்தலிலும் 3-வது முறையாக போட்டியிட்டவர் தோல்வியைத் தழுவினார். காட்பாடி காந்தி நகரில் குடும்பத்துடன் வசித்து வரும் நிலையில், அவரின் வீட்டில் அதிரடி காட்டியிருக்கிறது லஞ்ச ஒழிப்புத்துறை.
அதேபோல, பிரபல தொழிலதிபர் சேகர் ரெட்டியின் காட்பாடி வீட்டிலும் லஞ்ச ஒழிப்புத்துறை இன்று காலை சோதனையில் ஈடுபட்டது. அ.தி.மு.க மற்றும் தி.மு.க ஆட்சிக்காலங்களில் செல்வாக்குமிக்கவராக வலம் வந்தவர் சேகர் ரெட்டி. சமீபத்திலும், அவரது காட்பாடி வீட்டில் பல கோடி ரூபாய் மதிப்பிலான தங்க நகைகளும், பணமும் திருடப்பட்டது. இது சம்பந்தமாக, பணிப்பெண்களே கைதுசெய்யப்பட்டார்கள்.
இந்த நிலையில், சேகர் ரெட்டி வீட்டில் நடத்தப்பட்ட சோதனையை விரைவாக முடித்துக்கொண்டு வெளியேறிவிட்டார்கள் லஞ்ச ஒழிப்புத்துறையினர். இந்த திடீர் சோதனைக்கான காரணம் என்ன? என்பது பற்றி லஞ்ச ஒழிப்புத்துறை தரப்பில் இருந்து இன்னும் அதிகாரபூர்வ தகவல்கள் தெரிவிக்கப்படவில்லை.
