UP News: ఉత్తర్ ప్రదేశ్‌లో దారుణం జరిగింది. వివాహేతర సంబంధాన్ని వ్యతిరేకించిన భర్తను భార్య, ఆమె లవర్ కలిసి దారుణంగా హత్య చేశారు. ఈ సంఘటన ప్రతాప్‌గఢ్ జిల్లాలో జరిగింది. చనిపోయిన వ్యక్తిని పాత్రల వ్యాపారిగా గుర్తించారు. ఈ కేసులో భార్య , ఆమె లవర్‌తో సహా నలుగురిని అరెస్ట్ చేశారు. 45 ఏళ్ల ఉమాశంకర్ కౌశల్ అలియాస్ గుడ్డు మృతదేహం గురువారం ఉదయం లాల్‌గంజ్ ప్రాంతంలోని శీతల్‌మౌ కాలువ సమీపంలో కనిపించింది. ఈ కేసులో భార్య సుమన్ దేవి, షహన్ షా, విశాల్ శుక్లా, అవినాశ్ తివారీలను పోలీసులు అరెస్ట్ చేశారు.
ఉమాశంకర్ బుధవారం రాత్రి బైక్‌పై ఇంటి నుంచి బయటకు వెళ్లారు. తిరిగి రాకపోవడంతో కుటుంబ సభ్యులు ఆందోళన చెందారు. గురువారం ఉదయం కాలువలో మృతదేహంగా కనిపించాడు. మృతుడి ఛాతి, తలపై ఇటుకలతో కొట్టి చంపినట్లు గాయాలు ఉన్నాయని పోలీసులు తెలిపారు. ఉమాశంకర్ సోదరుడు ఈ హత్యలో భార్య సుమన్ దేవి, షహన్ షా ప్రమేయం ఉందని ఆరోపించడంతో కేసు విచారణ వేగవంతమైంది. సుమన్ దేవి, షహన్ షా మధ్య వివాహేతర సంబంధం ఉందని దీనిని వ్యతిరేకించడంతోనే భర్త ఉమాశంకర్ హత్య జరిగిందని పోలీసుల దర్యాప్తులో తేలింది. ఈ హత్యలో మరో ఇద్దరు కూడా సహకరించినట్లు గుర్తించారు. మొత్తం నలుగురు నిందితుల్ని పోలీసులు అరెస్ట్ చేసి, జైలుకు తరలించారు.
