AAP: పంజాబ్ అసెంబ్లీ ఎన్నికల ముందు కీలక పరిణామాలు చోటుచేసుకుంటున్నాయి. ఆమ్ ఆద్మీ పార్టీ(ఆప్) తన సొంత ఎమ్మెల్యేపైనే బహిష్కరణ వేటు వేసింది. మౌర్ అసెంంబ్లీ నియోజకవర్గం ఎమ్మెల్యే సుఖ్‌వీర్ మైసర్‌ఖానాను పార్టీ నుంచి బహిష్కరించింది. పార్టీ వ్యతిరేక కార్యకలాపాలకు పాల్పడటం, తప్పుడు వదంతులు వ్యాప్తి చేయడం, పార్టీ ప్రతిష్టను దెబ్బతీయడం వంటి ఆరోపణపై ఆప్ ఈ నిర్ణయం తీసుకుంది.
ఇటీవల ప్రభుత్వ పాఠశాలల్లో టీచర్ల కొరతను మైసర్‌ఖాన్ ఎత్తిచూపారు. తన సొంత ప్రభుత్వాన్ని ప్రశ్నించారు. ఈ నేపథ్యంలోనే ఆయనపై చర్యలు తీసుకున్నట్లు తెలుస్తోంది. ఇటీవల, ఆప్ ఎమ్మెల్యే 14 నిమిషాల లైవ్ వీడియో వైరల్‌గా మారింది. ఇందులో తన నియోజకవర్గంలో ప్రభుత్వ పాఠశాలల్లో ఉపాధ్యాయుల కొరత సమస్యను లేవనెత్తారు. ఈ సమస్యను ప్రస్తావిస్తూ భావోద్వేగానికి గురయ్యారు. సీఎం భగవంత్ మాన్, ఢిల్లీ మాజీ డిప్యూటీ సీఎం మనీష్ సిసోడియాతో పాటు పార్టీ కీలక నేతల వద్ద ఈ సమస్యను ప్రస్తావించినప్పటికీ సమస్య పరిష్కారం కాలేదని అన్నారు.
పిల్లలు చదువుతున్న ప్రభుత్వ పాఠశాలల్లో సమస్యలను తాను ప్రస్తావించానని, తనకు పార్టీ టికెట్ నిరాకరించినా, పిల్లల విద్యకు సంబంధించిన సమస్యలపై ప్రశ్నించడం ఆపబోనని ఆయన స్పష్టం చేశారు. రాజకీయ భవిష్యత్తు కోసం కాకుండా ప్రజలు, పిల్లల భవిష్యత్తు కోసం తాను మాట్లాడుతున్నానని అన్నారు.
