నార్త్ సైప్రస్ తీరంలో ఆదివారం ఘోర ప్రమాదం చోటుచేసుకుంది. సుమారు 270 మంది ప్రయాణికులతో వెళ్తున్న ఓ ఫెర్రీ సముద్రంలో బోల్తాపడింది. ఫెర్రీలోకి నీరు చేరడంతో ఈ ప్రమాదం జరిగినట్లు టర్కిష్ సైప్రియట్, టర్కీ మీడియా సంస్థలు వెల్లడించాయి. ప్రమాదం జరిగిన వెంటనే అధికారులు సహాయక, గాలింపు చర్యలు చేపట్టారు. ప్రస్తుతానికి ఎలాంటి ప్రాణనష్టం జరిగినట్లు సమాచారం అందలేదు.
నీరు చేరడంతో బోల్తా..
కాటమరాన్ తరహా ఈ ఫెర్రీ నార్త్ సైప్రస్‌లోని కైరేనియా (గిర్నే) పోర్టు నుంచి టర్కీలోని మెర్సిన్ ప్రావిన్స్‌లో ఉన్న తసూకు పోర్టుకు బయలుదేరింది. మార్గమధ్యంలో నార్త్ సైప్రస్ తీరానికి కొన్ని కిలోమీటర్ల దూరంలో ఫెర్రీలోకి ఒక్కసారిగా నీరు చేరడం ప్రారంభమైంది. దీంతో కొద్దిసేపటికే నౌక అదుపుతప్పి సముద్రంలో బోల్తాపడినట్లు టర్కీ ప్రభుత్వ ప్రసార సంస్థ తెలిపింది. నార్త్ సైప్రస్ రవాణా మంత్రి ఎర్హాన్ అరిక్లీ కూడా ఫెర్రీ బోల్తాపడినట్లు ధ్రువీకరించారు. ప్రమాదం జరిగిన ప్రాంతానికి సహాయక బృందాలు చేరుకున్నాయని తెలిపారు.
కొనసాగుతున్న రెస్క్యూ ఆపరేషన్
ప్రమాదం నేపథ్యంలో అధికారులు వెంటనే సెర్చ్ అండ్ రెస్క్యూ ఆపరేషన్ ప్రారంభించారు. ఫెర్రీలో ఉన్న ప్రయాణికులను గుర్తించి, వారిని సురక్షితంగా ఒడ్డుకు చేర్చేందుకు సహాయక బృందాలు చర్యలు చేపడుతున్నాయి. అయితే ఇప్పటివరకు ఎంతమందిని రక్షించారు? ప్రయాణికుల పరిస్థితి ఎలా ఉంది? అనే వివరాలు అధికారికంగా వెల్లడించలేదు. అలాగే ప్రమాదానికి కచ్చితమైన కారణం ఏమిటన్నది కూడా ఇంకా తెలియాల్సి ఉంది.
కైరేనియా నుంచి టర్కీలోని తసూకు వైపు వెళ్తున్న సమయంలో ఈ ప్రమాదం జరిగింది. ఫెర్రీలోకి నీరు చేరడానికి గల కారణాలు, ప్రమాద సమయంలో ప్రయాణికుల పరిస్థితి, ఇప్పటివరకు చేపట్టిన సహాయక చర్యలపై మరిన్ని వివరాలు అధికారులు వెల్లడించాల్సి ఉంది. రెస్క్యూ ఆపరేషన్ కొనసాగుతున్న నేపథ్యంలో తాజా సమాచారం కోసం అధికారులు పరిస్థితిని పర్యవేక్షిస్తున్నారు.
