டிஜிட்டல் செய்தி இணையதளங்களின் செயல்பாடுகளுக்கும் பத்திரிகைச் சுதந்திரத்துக்கும் மத்திய அரசின் தனிநபர் தரவுப் பாதுகாப்புச் சட்டம் (DPDP Act) அச்சுறுத்தலாக இருப்பதாகக் கூறி, இந்தியாவின் 21 முன்னணி செய்தி நிறுவனங்கள் சார்பில் உச்ச நீதிமன்றத்தில் வழக்குத் தொடரப்பட்டுள்ளது.
இந்தியாவின் டிஜிட்டல் தனிநபர் தரவுப் பாதுகாப்புச் சட்டம், 2023 ஆம் ஆண்டு குடியரசுத் தலைவரின் ஒப்புதலைப் பெற்று சட்டமாக்கப்பட்டது. இருப்பினும், இந்தச் சட்டம் மற்றும் அதற்கான விதிமுறைகள் (DPDP Rules, 2025) 2025 நவம்பர் 13 முதல் படிப்படியாக அமல்படுத்தப்பட்டு வருகின்றன.
குடிமக்களின் டிஜிட்டல் தனிப்பட்ட தரவுகளைப் பாதுகாப்பதும், தரவுகளைச் சேகரிக்கும் நிறுவனங்களின் பொறுப்புகளை வரையறுப்பதும் இந்தச் சட்டத்தின் முக்கியமான நோக்கமாகும்.
ஆனால் தனிநபர்களின் தகவல்களைப் பாதுகாப்பதற்காக மத்திய அரசு கொண்டுவந்த இந்த டிஜிட்டல் தனிநபர் தரவுப் பாதுகாப்புச் சட்டம் (DPDP Act), பத்திரிகைச் சுதந்திரத்துக்கே அச்சுறுத்தலாக மாறுமா? என்ற கேள்வி எழுந்துள்ளது.
இந்நிலையில்தான் இந்தச் சட்டத்தின் முக்கியப் பிரிவுகளை எதிர்த்து இந்தியாவின் 21 முன்னணி செய்தி நிறுவனங்களைப் பிரதிநிதித்துவப்படுத்தும் டிஜிட்டல் செய்தி வெளியீட்டாளர்கள் சங்கம் (Digital News Publishers Association – DNPA) உச்ச நீதிமன்றத்தில் வழக்குத் தொடர்ந்துள்ளது.
இச்சட்டம் புலனாய்வுப் பணிகளை நசுக்கும் என்றும், பத்திரிகையாளர்களின் தகவலாளர்களை அடையாளம் காண வழிவகுக்கும் என்றும் அக்குழு சார்பில் வாதிட்டிருப்பதாகத் தகவல்கள் வெளியாகி இருக்கின்றன.
டிஜிட்டல் தனிநபர் தரவுப் பாதுகாப்புச் சட்டம், ஒருவரின் தனிப்பட்ட தகவல்களைச் சேகரிப்பதற்கும் பயன்படுத்துவதற்கும் பல்வேறு கட்டுப்பாடுகளை விதிக்கிறது. ஆனால், செய்திகளைச் சேகரித்து மக்களுக்கு உண்மைகளைத் தெரிவிக்கும் பத்திரிகையாளர்களுக்கும் இதே கட்டுப்பாடுகளை விதிப்பது சரியல்ல என்று DNPA தரப்பு தெரிவித்துள்ளது.
மேலும், தகவல்களைக் கோருவதற்குச் சட்டம் வழங்கும் அதிகாரங்கள், செய்தியாளர்களின் தகவலாளர்களை அம்பலப்படுத்தக்கூடும் என்றும் அவர்கள் கூறியிருக்கின்றனர்.
இந்தச் செயல் ஒரு செய்தி நிறுவனத்தை மூடும் நிலைக்குத் தள்ளும் மற்றும் பத்திரிகைச் சுதந்திரத்தை முடக்கும் என்று எச்சரித்துள்ளனர். இந்த மனுவை ஏற்றுக்கொண்ட உச்ச நீதிமன்றத் தலைமை நீதிபதி சூர்யகாந்த் தலைமையிலான அமர்வு, மத்திய அரசுக்கு நோட்டீஸ் அனுப்பி விளக்கமளிக்குமாறு உத்தரவிட்டுள்ளது.
Junior Vikatan-ன் பிரத்யேக Whatsapp Group…
இணைவதற்கு இங்கே க்ளிக் செய்யவும்… https://tinyurl.com/2b963ppb
வணக்கம்,
BIG BREAKINGS முதல்… அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.
ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்… https://tinyurl.com/2b963ppb
