ധോണിയേക്കാൾ വലിയ ക്രിക്കറ്റ് താരം ഇന്ത്യയിൽ ഉണ്ടാകില്ല; ഹർഭജൻ
ഇന്ത്യയിൽ എംഎസ് ധോണിയേക്കാൾ വലിയ ക്രിക്കറ്റ് താരം ഉണ്ടാകില്ലെന്ന് സിഎസ്കെയിലും ഇന്ത്യൻ ദേശീയ ടീമിലും ധോണിയുടെ സഹതാരമായിരുന്ന സ്‌പിന്നർ ഹർഭജൻ സിംഗ്. ധോണിയുടെ നേതൃത്വത്തിൽ 2011ൽ ഇന്ത്യ ഏകദിന ലോകകപ്പ് നേടിയിരുന്നു. ധോണിയുടെ കീഴിൽ നാല് തവണ ഐപിഎൽ കിരീടം നേടാനും അഞ്ച് തവണ റണ്ണേഴ്‌സ് അപ്പ് ആവാനും ചെന്നൈ സൂപ്പർ കിംഗ്‌സിന് സാധിച്ചിട്ടുണ്ട്.
200 മത്സരങ്ങളിൽ ഒരു ഐപിഎൽ ടീമിന്റെ ക്യാപ്റ്റനാകുന്ന ആദ്യ കളിക്കാരനായി ധോണി അടുത്തിടെ ഐപിഎൽ റെക്കോർഡ് ബുക്കുകളിൽ തന്റെ പേര് രേഖപ്പെടുത്തിയിരുന്നു. ഏപ്രിൽ 21ന് സൺ റൈസേഴ്‌സ് ഹൈദരാബാദിന് എതിരായ സിഎസ്‌കെയുടെ ഹോം മത്സരത്തിന് മുന്നോടിയായി, ധോണിയേക്കാൾ വലിയ ആരാധകവൃന്ദം മറ്റാർക്കും ഇല്ലെന്ന് ഹർഭജൻ സിംഗ് പറഞ്ഞു.
“മഹേന്ദ്ര സിംഗ് ധോണി ഒരാൾ മാത്രമാണ്. ഇന്ത്യയിൽ അദ്ദേഹത്തേക്കാൾ വലിയ ക്രിക്കറ്റ് താരം ഉണ്ടാവില്ല. ആർക്കെങ്കിലും അദ്ദേഹത്തേക്കാൾ കൂടുതൽ റൺസ് നേടാം, മറ്റാർക്കെങ്കിലും അദ്ദേഹത്തേക്കാൾ കൂടുതൽ വിക്കറ്റുകൾ നേടാം, എന്നാൽ അദ്ദേഹത്തെക്കാൾ വലിയ ആരാധകവൃന്ദം മറ്റാർക്കും ഇല്ല,” ഹർഭജൻ സ്‌റ്റാർ സ്‌പോർട്‌സിൽ പറഞ്ഞു.
“ധോണി ഈ ആരാധകരെ ഹൃദയത്തോട് ചേർത്ത് സ്വീകരിച്ചു, ഒപ്പം സഹതാരങ്ങളെയും അദ്ദേഹം ബഹുമാനിക്കുന്നു. മറ്റുള്ളവരെ ഭ്രാന്തരാക്കും വിധം വളരെയധികം സ്നേഹത്തോടും വികാരത്തോടും കൂടിയാണ് അദ്ദേഹം നടക്കുന്നത്, പക്ഷേ ധോണി ഈ സ്നേഹവും വികാരവും 15 വർഷമായി തന്റെ ഹൃദയത്തിൽ വഹിച്ചു, അദ്ദേഹം ഇപ്പോഴും ഒട്ടും മാറിയിട്ടില്ല.” ഹർഭജൻ ചൂണ്ടിക്കാട്ടി.
ബാറ്റിംഗ് ഓൾറൗണ്ടർ ശിവം ദുബെയുടെ ഹിറ്റിംഗ് കഴിവിനെയും ഹർഭജൻ പ്രശംസിച്ചു, ചെന്നൈ സൂപ്പർ കിംഗ്‌സ് അത്തരം ഗുണങ്ങളുള്ള കളിക്കാരെ വളരെയധികം വിലമതിക്കുന്നു. ബാറ്റിംഗ് നിരയിൽ ദുബെയ്ക്ക് കൂടുതൽ അവസരങ്ങൾ ലഭിക്കണമെന്നും മുൻ ഓഫ് സ്‌പിന്നർ കൂട്ടിച്ചേർത്തു.