Benefits of Hugging: ప్రస్తుత ఆధునిక జీవితంలో పనిఒత్తిడి, కుటుంబ బాధ్యతలు, మానసిక ఆందోళనలు రోజురోజుకు పెరుగుతున్నాయి. ఈ పరిస్థితుల్లో భార్యాభర్తల మధ్య ప్రేమ, అనుబంధం మరింత బలపడటం చాలా అవసరం. రోజంతా బిజీగా గడిపిన తర్వాత ఒకరినొకరు కౌగిలించుకుని నిద్రపోవడం కేవలం ప్రేమను వ్యక్తపరిచే చర్య మాత్రమే కాదు.. శారీరకంగా, మానసికంగా కూడా ఎన్నో ప్రయోజనాలను అందిస్తుంది. పరిశోధనల ప్రకారం హగ్ చేసుకోవడం వల్ల శరీరంలో కొన్ని కీలక హార్మోన్లు విడుదలై ఆరోగ్యాన్ని మెరుగుపరుస్తాయి. మరి ఆ వివరాలేంటో చూద్దామా..
ఆక్సిటోసిన్ విడుదల:
భార్యాభర్తలు హగ్ చేసుకున్నప్పుడు మెదడులో ‘ఆక్సిటోసిన్’ (Oxytocin) అనే హార్మోన్ విడుదల అవుతుంది. దీనిని సాధారణంగా “లవ్ హార్మోన్” లేదా “కడ్డల్ కెమికల్” అని పిలుస్తారు. దీని వల్ల కలిగే ప్రయోజనాల విషయానికి వస్తే.. ఒత్తిడికి కారణమయ్యే ‘కార్టిసాల్’ హార్మోన్ తగ్గుతుంది. దీని వల్ల మనసుకు ప్రశాంతత లభిస్తుంది. ఇంకా భద్రత, నమ్మకం భావనలు పెరుగుతాయి. దీనితో దాంపత్య బంధం మరింత బలపడుతుంది.
నిద్ర నాణ్యత మెరుగు:
హగ్ చేసుకుని నిద్రపోవడం వల్ల శరీరం సహజంగానే రిలాక్స్ అవుతుంది. దీనితో నిద్ర నాణ్యత మెరుగుపడుతుంది. రక్తపోటు, హృదయ స్పందన స్థిరపడటంతో త్వరగా నిద్ర పట్టే అవకాశం ఉంటుంది. ఇది గాఢ నిద్రకు సహాయపడుతుంది. అలాగే రాత్రి మధ్యలో మేల్కొనే అవకాశాలు తగ్గుతాయి. ఇంకా ఉదయం లేవగానే తాజాగా అనిపిస్తుంది.
ఒత్తిడి, ఆందోళన తగ్గుదల:
శారీరక స్పర్శ వల్ల మెదడు ప్రశాంత సంకేతాలను స్వీకరిస్తుంది. దీంతో మానసిక ఒత్తిడి తగ్గి, ఆందోళన స్థాయిలు క్రమంగా నియంత్రణలోకి వస్తాయి. దీని ఫలితంగా.. మూడ్ మెరుగుపడుతుంది. ఇంకా చిరాకు తగ్గుతుంది. దీనితో సానుకూల ఆలోచనలు పెరుగుతాయి. ముక్యంగా డిప్రెషన్ లక్షణాలు తగ్గే అవకాశం ఉంటుంది.
గుండె ఆరోగ్యానికి మేలు:
బాగా హగ్ చేసుకునే అలవాటు గుండె ఆరోగ్యంపై కూడా సానుకూల ప్రభావం చూపుతుంది. అది ఎలా అంటే..? రక్తపోటు నియంత్రణ ఉండడంతో.. గుండెపై ఒత్తిడి తగ్గుతుంది. దీనితో హృదయ సంబంధిత సమస్యల ప్రమాదం తగ్గే అవకాశం ఉంటుంది.
రోగనిరోధక శక్తి పెరుగుదల:
ఆక్సిటోసిన్, ఇతర సానుకూల హార్మోన్ల ప్రభావంతో శరీరంలోని రోగనిరోధక వ్యవస్థ మరింత సమర్థవంతంగా పనిచేస్తుంది. దీనివల్ల సాధారణ జలుబు వంటి సమస్యల నుంచి రక్షణ లభిస్తుంది. శరీరం వ్యాధులతో పోరాడే సామర్థ్యం పెరుగుతుంది.
మరింత బలంగా దాంపత్య బంధం:
హగ్ అనేది మాటల కంటే ఎక్కువగా భావాలను వ్యక్తపరిచే మార్గం. ప్రతిరోజూ కొద్దిసేపు కౌగిలించుకోవడం వల్ల భార్యాభర్తల మధ్య ప్రేమ, అవగాహన, నమ్మకం మరింత పెరుగుతాయి. దీనివల్ల అనే దీర్ఘకాలిక ప్రయోజనాలు ఉన్నాయి. దంపతుల మధ్య మనస్పర్థలు తగ్గుతాయి. ఇంకా పరస్పర గౌరవం పెరుగుతుంది. వైవాహిక సంబంధం మరింత సంతోషకరంగా మారుతుంది.
