Coimbatore Blasts: 1998 కోయంబత్తూర్ పేలుళ్ల కేసులో యావజ్జీవ కారాగార శిక్ష అనుభవిస్తున్న ఐదుగురికి 60 రోజుల పాటు పెరోల్ మంజూరు చేస్తూ తమిళనాడులోని విజయ్ సర్కార్ నిర్ణయం తీసుకోవడం వివాదాస్పదమైంది. టీవీకే ప్రభుత్వంపై ప్రతిపక్షాలు తీవ్ర విమర్శలు చేస్తున్నాయి. బీజేపీ సీనియర్ నేత ఎల్‌కే అద్వానీ లక్ష్యంగా ఈ పేలుళ్లు జరిగాయి. రాజకీయ లబ్ధి కోసం, శిక్షపడిన ఉగ్రవాదుల పట్ల విజయ్ నేతృత్వంలోని టీవీకే (తమిళగ వెట్రి కజగం) ప్రభుత్వం పక్షపాత వైఖరిని అవలంబిస్తోందని బీజేపీ ఆరోపించింది. వారు చాలా కాలంగా జైలులో గడిపినందుకు, ఇతర నిందితులకు ఇచ్చినట్లే వీరికి కూడా పెరోల్ ఇవ్వడం సాధారణ ప్రక్రియలో భాగమే అని ప్రభుత్వం వాదిస్తోంది.
టీవీకే ఎమ్మెల్యే వీఎంఎస్ ముస్తఫా పెరోల్ ఇచ్చినందుకు ప్రభుత్వానికి ధన్యవాదాలు తెలుపుతూ ప్రకటన విడుదల చేశారు. జైలు నుంచి విడుదల అవుతున్న వారిలో ఉన్న 46 నుండి 55 సంవత్సరాల మధ్య వయస్సు గల ఐదుగురు దోషులు – మహమ్మద్ అన్సారీ, మహమ్మద్ అలీ, మోనప్ప అలియాస్ మహమ్మద్ హసన్, మహమ్మద్ అజమ్, నవాబ్ ఖాన్ ఉన్నారు. వ్యక్తిగత పరిస్థితులు, ఆరోగ్య పరిస్థితుల్ని పేర్కొంటూ వీరు పెరోల్ కోసం అప్లై చేశారు.
19 పేలుళ్లు, 58 మంది మృతి..
1998 ఫిబ్రవరి 14న అప్పటి బీజేపీ అధ్యక్షుడు ఎల్‌కే అద్వానీ కోయంబత్తూర్‌లోని ఆర్ఎస్ పురం ఎన్నికల సభలో పాల్గొనేందుకు రావాల్సి ఉంది. ఆయన సభకు ముందు నగరంలో మధ్యాహ్నం 4 గంటల సమయంలో వరస బాంబు పేలుళ్లు సంభవించాయి. కోయంబత్తూరు మెడికల్ కాలేజ్ ఆసుపత్రి, రైల్వే స్టేషన్ సహా నగరంలోని పలు ప్రాంతాలు లక్ష్యంగా మారాయి. పూంపుహార్ టౌన్ హాల్, ఉక్కడం చేపల మార్కెట్, కరుణానిధి నగర్ వంటి ప్రాంతాల్లోనూ పేలుళ్లు జరిగాయి. ఫిబ్రవరి 15, 16 తేదీల్లో కూడా పేలుళ్లు కొనసాగాయి.
19 బాంబు పేలుళ్లలో 58 మంది ప్రాణాలు కోల్పోగా, 250 మంది గాయపడ్డారు. సుమారు రూ. 4.37 కోట్ల ఆస్తి నష్టం వాటిల్లింది. దర్యాప్తులో అల్ ఉమ్మా అనే సంస్థ దాడులకు పాల్పడినట్లు తేలింది. ఈ సంస్థను ఎస్ఏ బాషా ఏర్పాటు చేశారు. 2024లో ఆయన మరణించాడు. ఈ కేసులో 168 మందిని అరెస్ట్ చేయగా, 158 మందికి శిక్ష పడింది. సుమారు 40 మందికి జీవిత ఖైదు విధించారు. ప్రధాన నిందితుడు బాషాకు కూడా యావజ్జీవ శిక్ష పడింది.
