Snake bite: ఆర్టిఫిషియల్ ఇంటెలిజెన్స్(AI) అత్యవసర సమయాల్లో ఎలా ఉపయోగపడుతుందనే దానికి ఈ ఘటనే ఉదాహరణ. మధ్యప్రదేశ్‌లోని గ్వాలియర్‌లో ఓ హెడ్ కానిస్టేబుల్‌ను పాము కాటేసింది. బిజౌలి పోలీస్ స్టేషన్‌లో పనిచేస్తున్న పూరన్ సికర్వార్ తన ప్రభుత్వ క్వార్టర్స్‌లో నిద్రిస్తుండగా.. మంచంలో దాక్కున్న విషపూరితమైన కట్లపాము ఆయన చేతిని రెండుసార్లు కాటు వేసింది. గురువారం రాత్రి ఈ ఘటన జరిగింది. పాము కాటు తర్వాత సహాయం కోసం గట్టిగా అరవడంతో స్టేషన్ ఇంఛార్జ్ సౌరభ్ శ్రీవాస్తవ, ఇతర సిబ్బంది అక్కడికి చేరుకుని సహాయక చర్యలు ప్రారంభించారు.
మంచంపై ఉన్న పామును గుర్తించిన స్టేషన్ ఇంఛార్జ్ ముందుగా దానిని ఫోటో తీసి, ఏఐ ద్వారా సమాచారం సేకరించారు. ఏఐ ఇచ్చిన సూచనల ప్రకారం ప్రథమ చికిత్స చేశారు. ఏఐ సూచించిన జాగ్రత్తలు పాటిస్తూ పోలీస్ సిబ్బంది హెడ్ కానిస్టేబుల్‌ను వెంటనే జయరోగ్య ఆస్పత్రికి తరలించారు. వైద్యులు పాము ఫోటోను పరిశీలించి, ఫోటో ఆధారంగా కట్ల పాముగా తేల్చి, దాని విషానికి విరుగుడు చికిత్స పాటించారు. చివరకు సికర్వార్ ప్రాణాపాయం నుంచి బయటపడ్డాడు. ప్రస్తుతం ఆయన పరిస్థితి నిలకడగా ఉంది. ఆరోగ్యం క్రమంగా మెరుగుపడుతోందని వైద్యులు తెలిపారు. సిబ్బంది సమయస్పూర్తి, ఏఐ సాయంతో కానిస్టేబుల్ ప్రాణాలు దక్కాయి.
