தவெகவின் முதற்கட்ட வேட்பாளர் பட்டியலை விஜய் உறுதி செய்திருக்கும் நிலையில், சென்னைக்குள் போட்டி போடும் தவெகவின் பொதுச்செயலாளர் புஸ்ஸி ஆனந்தும் ஆதவ் அர்ஜூனாவும் போட்டிப் போட்டுக் கொண்டு வாக்காளர்களுக்கும் நிர்வாகிகளுக்கும் பரிசுப்பொருட்களை வழங்கி வருகின்றனர்.
சட்டமன்றத் தேர்தலில் போட்டியிட தவெகவின் பொதுச்செயலாளரான புஸ்ஸி ஆனந்துக்கு தி.நகர் தொகுதியையும் தேர்தல் மேலாண்மைப் பொதுச்செயலாளரான ஆதவ் அர்ஜூனாவுக்கு வில்லிவாக்கம் தொகுதியையும் விஜய் இறுதி செய்திருப்பதாக கட்சி வட்டாரத்தில் கிசுகிசுக்கின்றனர். இந்நிலையில், இருவரும் தாங்கள் போட்டியிடும் தொகுதிகளில் தொடர்ந்து நிர்வாகிகள் சந்திப்புகளையும் நலத்திட்ட உதவிகளையும் வழங்கி வருகின்றனர்.
மார்ச் 8 ஆம் தேதி மகளிர் தினத்தில் வில்லிவாக்கத்தில் மாவட்டச் செயலாளர் பூக்கடை குமார் தலைமையில் ஆதவ் அர்ஜூனா நிர்வாகிகள் சந்திப்பை நடத்தியிருந்தார். அந்த நிகழ்வில் கலந்துகொண்ட நூற்றுக்கணக்கான பெண் நிர்வாகிகளுக்கு ஆதவ் படமும் விசில் சின்னமும் பொறிக்கப்பட்ட டேபிள் ஃபேன்கள் பரிசுப்பொருட்களாக வழங்கப்பட்டது.
தி.நகர் தொகுதியில் போட்டியிடும் ஆனந்தும் தன் பங்குக்கு தொகுதிக்குள் அடுத்தடுத்து நிகழ்ச்சிகளை நடத்தி வருகிறார். மாவட்டச் செயலாளர் அப்புனு தலைமையில் நேற்று ஒரு செயல் வீரர்கள் கூட்டத்தை நடத்தியிருந்தார். ‘தி.நகர் தொகுதி மட்டுமல்ல 234 தொகுதிகளும் நமக்கு சாதகமாக இருக்கிறது. தளபதி முதலமைச்சர் ஆவது உறுதி!’ எனப் பேசிய ஆனந்த் 1000 பேருக்கு சூழலுக்கு ஏற்ற பரிசாக ‘எலெக்ட்ரிக் குக்கர்’ யைப் பரிசாக வழங்கியிருந்தார். நாளையும் இதே மாதிரியாக ஒரு கூட்டத்தை நடத்தி 400 பேருக்கு எலெக்ட்ரிக் குக்கர்களை வழங்கவிருப்பதாக கூறுகிறார் மாவட்டச் செயலாளர் அப்புனு.
தவெகவின் முக்கியஸ்தர்கள் நிற்கும் தொகுதிகளில் எதிர்க்கட்சிகள்தான் பரிசு மழையை பொழிவார்கள் என எதிர்பார்க்க, தவெகவினரே கிஃப்ட் பாக்ஸ்களை இறக்குவதில் வாக்காளர்கள் டபுள் ஹேப்பி ஆகியிருக்கின்றனர்.
