உலகப் பணக்காரர் எலான் மஸ்க் மற்றும் அமெரிக்க அதிபர் டொனால்ட் ட்ரம்ப் இடையே பொதுவெளியில் பிரச்னை வெடித்து, வாக்குவாதங்கள் நடைபெற்றுவரும் சூழலில், இருவருக்கும் நடுவில் பேச்சுவார்த்தை நடத்தி அமைதியை நிலைநாட்ட ரஷ்யா தயாராக இருக்கிறது எனக் கூறியுள்ளார் ரஷ்யாவின் முன்னாள் அதிபரும், முன்னாள் பிரதமருமான திமித்ரி மெட்வெடேவ்.
இப்போது ரஷ்ய பாதுகாப்புப் பேரவையின் துணைத் தலைவராக இருக்கும் இவர், “D மற்றும் E இடையே சமாதானத்தை ஏற்படுத்தும் ஒரு ஒப்பந்தத்தை இறுதி செய்ய நாங்கள் தாயாரா இருக்கிறோம்.
அதற்குத் தகுந்த கட்டணத்தை ஸ்டார்லின்க் பங்குகளாகப் பெற்றுக்கொள்கிறோம்” எனத் தனது எக்ஸ் தளத்தில் எழுதியுள்ளார்.
இத்துடன், “சண்டை போடாதீர்கள் (Don’t Fight Guys)” என்றும் கூறியுள்ளார். இவரது நையாண்டிக்குச் சிரிக்கும் எமோஜியுடன் ரிப்ளைச் செய்துள்ளார் மஸ்க்.
அமெரிக்காவின் இரண்டு ஆகப் பெரும் ஆளுமைகள் தங்களுக்குள் மோதிக்கொள்வதை ரஷ்யா ஆவலுடன் வேடிக்கை பார்ப்பதையே புதினின் நெருங்கிய நண்பரான மெட்வெடேவ் கிண்டலாக வெளிப்படுத்தியிருக்கிறார் என்கின்றனர் அரசியல் நிபுணர்கள்.
We are ready to facilitate the conclusion of a peace deal between D and E for a reasonable fee and to accept Starlink shares as payment. Don't fight, guys!
— Dmitry Medvedev (@MedvedevRussiaE) June 6, 2025
ட்ரம்ப்பின் பிக் பியூடிஃபுல் பில் மசோதாவால் அவரது நண்பராக இருந்த எலான் மஸ்க் அவருக்கு எதிராகத் திரும்பியுள்ளார். ட்ரம்ப்பின் முகாமிலேயே பிரச்னைகள் இருக்கும் சூழலில் அவர் ரஷ்யா – உக்ரைனுக்கு இடையே இடைத்தரகராகச் செயல்பட முயல்வதையும் இதில் மெட்வெடேவ் சுட்டிக்காட்டியுள்ளார் என்கின்றனர்.
இதுமட்டுமல்லாமல் சர்வதேச விவகாரங்களுக்கான டுமா குழுவின் முதல் துணைத் தலைவர் திமித்ரி நோவிகோவ், “மஸ்க் முற்றிலும் மாறுபட்ட விளையாட்டை ஆடுகிறார், இதனால் அவருக்கு அரசியல் தஞ்சம் தேவைப்படாது. அப்படித் தேவைப்பட்டால் ரஷ்யா தஞ்சமளிக்க தயார்” எனக் கூறியுள்ளார்.
எலான் மஸ்க் – ட்ரம்ப் இடையிலான மோதல் தொடர்ந்து வளர்ந்து வருகிறது. ட்ரம்ப் ஆதரவாளர்கள் எலான் மஸ்க் சட்டவிரோதமாக அமெரிக்காவில் குடியிருப்பவர் என்றும், அவரது நிறுவனங்களை அரசு கையகப்படுத்த வேண்டும் என்றும் குரலெழுப்பியுள்ளனர்.
ட்ரம்ப்பின் பெயர் எப்ஸ்டீன் பட்டியலில் உள்ளது என்றும் தான் புதிய கட்சி தொடங்கப்போகிறேன் என்றும் மஸ்க் பேசிவருகிறார்.
