ഇന്ത്യയിൽ നിന്ന് വിദ്യാർത്ഥികൾക്ക് കീ പരീക്ഷ എഴുതാം: യുക്രെയ്ൻ
റഷ്യൻ അധിനിവേശത്തെത്തുടർന്ന് യുക്രെയ്‌നിൽ നിന്ന് നാട്ടിലേക്ക് മടങ്ങിയ ഇന്ത്യൻ മെഡിക്കൽ വിദ്യാർത്ഥികൾക്ക് ഇന്ത്യയിൽ നിന്ന് കീ പരീക്ഷ എഴുതാൻ അനുമതി നൽകും. മൂന്ന് ദിവസത്തെ ഡൽഹി സന്ദർശനത്തിനിടെ യുക്രെയ്നിന്റെ പ്രഥമ വിദേശകാര്യ സഹ മന്ത്രി എമിൻ ധപറോവയാണ് ഇക്കാര്യം ഇന്ത്യയെ അറിയിച്ചത്.
‘ഇന്ത്യൻ മെഡിക്കൽ വിദ്യാർത്ഥികളുടെ വിഷയത്തിൽ, വിദേശ മെഡിക്കൽ വിദ്യാർത്ഥികളെ അവരുടെ രാജ്യത്ത് ഏകീകൃത സംസ്ഥാന യോഗ്യതാ പരീക്ഷ എഴുതാൻ യുക്രെയ്ൻ അനുവദിക്കുമെന്ന് ഡെപ്യൂട്ടി വിദേശകാര്യ മന്ത്രി പരാമർശിച്ചു,’ വിദേശകാര്യ മന്ത്രാലയം അറിയിച്ചു. ധപറോവ ഇന്ത്യാ സന്ദർശനം പൂർത്തിയാക്കിയപ്പോൾ കേന്ദ്ര വിദേശകാര്യ മന്ത്രാലായംഒരു പ്രസ്താവന പുറപ്പെടുവിച്ചു.
കഴിഞ്ഞ വർഷം ഫെബ്രുവരിയിൽ റഷ്യൻ അധിനിവേശം ആരംഭിക്കുമ്പോൾ ഏകദേശം 19,000 ഇന്ത്യൻ വിദ്യാർത്ഥികൾ യുക്രെയ്‌നിൽ പഠിക്കുകയായിരുന്നു. ഇന്ത്യയുമായി കൂടുതൽ ശക്തവും അടുത്തതുമായ ബന്ധം കെട്ടിപ്പടുക്കാനുള്ള യുക്രെയ്നിന്റെ ആഗ്രഹം ധപറോവ തന്റെ സന്ദർശന വേളയിൽ എടുത്തുകാണിച്ചു,” കേന്ദ്ര വിദേശകാര്യമന്ത്രാലയം പുറത്തിറക്കിയ പ്രസ്താവനയിൽ പറഞ്ഞു.
കണക്കുകൾ പ്രകാരം, ഏകദേശം 2,000 ഇന്ത്യൻ വിദ്യാർത്ഥികൾ യുക്രെയ്‌നിലേക്ക് മടങ്ങിപ്പോയി. അവർ കൂടുതലും താമസിക്കുന്നത് കിഴക്കൻ യൂറോപ്യൻ രാജ്യത്തിന്റെ പടിഞ്ഞാറൻ ഭാഗത്താണ്. യുക്രേനിയൻ അധികാരികളുടെ മുൻകൈയിൽ, ഇപ്പോഴും ഇന്ത്യയിൽ ഉള്ള വിദ്യാർത്ഥികൾക്ക് ഓൺലൈൻ ക്ലാസുകളിൽ ചേരാനും ഏകീകൃത സംസ്ഥാന യോഗ്യതാ പരീക്ഷയിൽ പങ്കെടുക്കാനും കഴിയും.
ധപറോവയുടെ ഇന്ത്യാ സന്ദർശനം ഇരു രാജ്യങ്ങളും തമ്മിലുള്ള സഹകരണം സുഗമമാക്കുമെന്നും പ്രസ്താവനയിൽ പറയുന്നു. വിദേശകാര്യ സഹമന്ത്രി മീനാക്ഷി ലേഖിലുമായും ധപറോവ കൂടിക്കാഴ്ച നടത്തിയിരുന്നു. അധിക മാനുഷിക സഹായം ആവശ്യപ്പെട്ടുള്ള സെലൻസ്‌കിയുടെ കത്ത് ധപറോവ കൈമാറുകയും ചെയ്തു.
സഹായിക്കണം! മോദിയ്ക്ക് കത്തെഴുതി സെലൻസ്‌കി
Zelenskyy wrote Letter to PM Modi: റഷ്യ-യുക്രെയ്ൻ യുദ്ധത്തിൽ ഇന്ത്യയുടെ ഇടപെടൽ തേടി പ്രധാനമന്ത്രി നരേന്ദ്രമോദിയ്ക്ക് കത്തെഴുതി പ്രസിഡന്റ് വൊളോഡിമിർ സെലൻസ്‌കി. മെഡിക്കൽ ഉപകരണങ്ങൾ ഉൾപ്പെടെയുള്ള അധിക മാനുഷിക സഹായം അഭ്യർത്ഥിച്ചാണ് കത്തെഴുതിയിരിക്കുന്നത്. നാല് ദിവസത്തെ ഇന്ത്യാ സന്ദർശത്തിനിടെ യുക്രെയ്‌നിയൻ ഡെപ്യൂട്ടി വിദേശകാര്യമന്ത്രി എമിൻ ധപറോവ കേന്ദ്ര വിദേശകാര്യ സാംസ്‌കാരിക സഹമന്ത്രി മീനാക്ഷി ലേഖിയ്ക്കാണ് കത്ത് നൽകിയത്.
ഇരു നേതാക്കളും ഉഭയകക്ഷി, ആഗോള വിഷയങ്ങളിൽ പരസ്പര താൽപ്പര്യമുള്ള കാഴ്ചപ്പാടുകൾ കൈമാറി. യുക്രെയ്നിന് ‘വർദ്ധിപ്പിച്ച മാനുഷിക സഹായം’ ഉറപ്പ് നൽകിയിട്ടുണ്ടെന്ന് മീനാക്ഷി ലേഖി പറഞ്ഞു. യോഗത്തെ ‘ഫലപ്രദം’ എന്നാണ് ധപറോവ വിശേഷിപ്പിച്ചത്. ഇന്ത്യൻ കൗൺസിൽ ഓഫ് വേൾഡ് അഫയേഴ്സിൽ (ഐസിഡബ്ല്യുഎ) നടത്തിയ പ്രസംഗത്തിന് മുന്നോടിയായി ചൊവ്വാഴ്ചയാണ് എമിൻ ധപറോവ മീനാക്ഷി ലേഖിയെ കണ്ടത്.
കഴിഞ്ഞ വർഷം ഫെബ്രുവരിയിൽ റഷ്യ-യുക്രെയ്ൻ യുദ്ധം പൊട്ടിപ്പുറപ്പെട്ടതിനുശേഷം ഇന്ത്യ സന്ദർശിക്കുന്ന ആദ്യത്തെ യുക്രേനിയൻ ഉന്നത ഉദ്യോഗസ്ഥയാണ് ധപറോവ. സെലെൻസ്‌കി ഇന്ത്യയിൽ നടക്കുന്ന ജി 20 ഉച്ചകോടിയെ അഭിസംബോധന ചെയ്യാൻ ആഗ്രഹിക്കുന്നുവെന്ന് ധപറോവ പറഞ്ഞു. ജി 20 ബാലി ഉച്ചകോടിയെ വീഡിയോ കോൺഫറൻസിലൂടെ ഉക്രേനിയൻ പ്രസിഡന്റ് അഭിസംബോധന ചെയ്തിരുന്നു.
ആഗോള നേതാവെന്ന നിലയിലും ജി 20 യുടെ നിലവിലെ അധ്യക്ഷനെന്ന നിലയിലും ഇന്ത്യക്ക് സമാധാനം കൊണ്ടുവരുന്നതിൽ വലിയ പങ്ക് വഹിക്കാനാകുമെന്നും ഇന്ത്യൻ ഉദ്യോഗസ്ഥർ ഉടൻ തന്നെ കൈവ് സന്ദർശിക്കുമെന്ന് പ്രതീക്ഷിക്കുന്നതായും ഡെപ്യൂട്ടി വിദേശകാര്യ മന്ത്രി പറഞ്ഞു. യുക്രെയ്ൻ- റഷ്യ യുദ്ധം ആരംഭിച്ചതിന് ശേഷം, പ്രസിഡന്റ് വ്ളാഡിമിർ പുടിനുമായും സെലൻസ്‌കിയുമായും നരേന്ദ്രമോദി നിരവധി തവണ സംസാരിച്ചിരുന്നു.