തകർപ്പൻ ഐപിഎൽ റെക്കോർഡുമായി റബാദ; മറികടന്നത് സാക്ഷാൽ മലിംഗയെ
ഇന്ത്യൻ പ്രീമിയർ ലീഗിൽ ഒരു തകർപ്പൻ റെക്കോർഡ് സ്വന്തം പേരിലാക്കി പഞ്ചാബ് കിങ്സിന്റെ പേസർ കാഗിസോ റബാദ. ഐപിഎല്ലിൽ മത്സരങ്ങളുടെ കണക്കിൽ ഏറ്റവും വേഗത്തിൽ നൂറ് വിക്കറ്റ് നേടുന്ന താരമായാണ് റബാദ മാറിയത്. 64 ഐപിഎൽ മത്സരങ്ങളിൽ നിന്ന് നൂറ് വിക്കറ്റ് തികച്ചാണ് റബാദ റെക്കോർഡ് ബുക്കിൽ തന്റെ പേരെഴുതിച്ചേർത്തത്.
ഇന്നലെ നടന്ന മത്സരത്തിൽ ഗുജറാത്ത് ടൈറ്റൻസിന്റെ വൃദ്ധിമാൻ സാഹയെ പുറത്താക്കിയാണ് ദക്ഷിണാഫ്രിക്കൻ പേസറായ റബദ വിക്കറ്റിൽ സെഞ്ച്വറി തികച്ചത്. ഇതോടെ 70 മത്സരങ്ങളിൽ നിന്ന് 100 വിക്കറ്റ് നേടിയ ശ്രീലങ്കയുടെ വിഖ്യാത താരം ലസിത് മലിംഗയുടെ റെക്കോർഡ് റബാദ മറികടന്നു. ഭുവനേശ്വർ കുമാറാണ് വേഗത്തിൽ നൂറ് വിക്കറ്റ് നേടിയവരിൽ മൂന്നാമൻ. റാഷിദ് ഖാൻ, അമിത് മിശ്ര, ആശിഷ് നെഹ്റ, യുസ്വേന്ദ്ര ചഹൽ എന്നിവരും ആദ്യ അഞ്ചിൽ ഇടം പിടിച്ചിട്ടുണ്ട്.
2017-ൽ ഡെൽഹിയിലൂടെയാണ് റബാദ ഐപിഎല്ലിലെത്തുന്നത്. 2019. 2020 സീസണുകളിൽ ഡെൽഹി ക്യാപിറ്റൽസിനെ ഐപിഎൽ പ്ലേ ഓഫിലേക്ക് നയിക്കുന്നതിൽ നിർണായക പങ്കാണ് റബാദ വഹിച്ചത്. തുടർന്ന് കഴിഞ്ഞ വർഷത്ത മെഗാലേലത്തിൽ താരത്തെ പഞ്ചാബ് 9.25 കോടി രൂപ മുടക്കി സ്വന്തമാക്കുകയായിരുന്നു.