ബംഗാളിന് രണ്ടാം വന്ദേ ഭാരത്; ട്രയല്‍ റണ്‍ ഇന്ന്
പശ്ചിമ ബംഗാളിലെ രണ്ടാമത്തെ വന്ദേ ഭാരത് ട്രെയിന്‍ ഉടന്‍ സര്‍വീസ് ആരംഭിക്കും. ഹൗറയ്ക്കും പുരിക്കും ഇടയില്‍ ഓടുന്ന സെമി-ഹൈ സ്പീഡ് ട്രെയിന്‍ അടുത്ത മാസം ഫ്‌ളാഗ് ഓഫ് ചെയ്യുമെന്നാണ് വിവരം. രണ്ട് സ്റ്റേഷനുകള്‍ക്കിടയില്‍ പരിമിതമായ സ്റ്റോപ്പുകളുണ്ടാകും. ജഗന്നാഥ ക്ഷേത്രം സന്ദര്‍ശിക്കാനെത്തുന്ന ബംഗാളില്‍ നിന്നും രാജ്യത്തുടനീളമുള്ള തീര്‍ത്ഥാടകരെയും വിനോദസഞ്ചാരികളെയും ലക്ഷ്യമിട്ടാണ് പുരി-ഭുവനേശ്വര്-ഹൗറ റൂട്ടില്‍ ട്രെയിന്‍ ഓടുന്നതെന്ന് റെയില്‍വേ അധികൃതര്‍ അറിയിച്ചു.
വെള്ളിയാഴ്ച ഹൗറയില്‍ നിന്ന് പുരിയിലേക്കും തിരിച്ചും ട്രെയിന്‍ പരീക്ഷണ ഓട്ടം നടത്തുമെന്ന് വൃത്തങ്ങള്‍ അറിയിച്ചു. രാവിലെ 6.10-ന് ഹൗറയില്‍ നിന്ന് പുറപ്പെട്ട് 8.30-ന് തിരിച്ചെത്തും, ഖരഗ്പൂരില്‍ 7.38 മുതല്‍ 7.40 വരെ രണ്ട് മിനിറ്റ് നിര്‍ത്തും. ട്രയല്‍ റണ്ണിന് ശേഷം ഈ ട്രെയിന്‍ 12.35 ന് പുരിയില്‍ എത്തി 1.50 ന് പുറപ്പെടും. രണ്ടാമത്തെ ട്രയല്‍ റണ്‍ ഏപ്രില്‍ 30-ന് ഹൗറയില്‍ നിന്ന് ഭദ്രക് (ബിഎച്ച്‌സി) വരെയും തിരിച്ചും നടക്കും. മെയ് രണ്ടോ മൂന്നോ ആഴ്ച മുതല്‍ സാധാരണ യാത്രക്കാര്‍ക്കായി ട്രെയിന്‍ സര്‍വീസ് ആരംഭിക്കുമെന്ന് റെയില്‍വേ വൃത്തങ്ങള്‍ അറിയിച്ചു.
വന്ദേ ഭാരത് എക്സ്പ്രസിന്റെ വിജയകരമായ ട്രയല്‍ റണ്ണിന് ശേഷം ട്രെയിന്‍ പൂര്‍ണ്ണ ഘട്ടത്തില്‍ ഉടന്‍ പ്രവര്‍ത്തനക്ഷമമാക്കുമെന്ന് ഖരഗ്പൂരിലെ സീനിയര്‍ ഡിവിഷണല്‍ കൊമേഴ്സ്യല്‍ മാനേജര്‍ രാജേഷ് കുമാര്‍ പറഞ്ഞു. ‘ഇപ്പോള്‍, ട്രെയിനിന്റെ സര്‍വീസ് ആരംഭിക്കുന്നതിനുള്ള അന്തിമ തീയതി തീരുമാനിച്ചിട്ടില്ല. തീയതി സ്ഥിരീകരിച്ചാല്‍ എല്ലാ വിഭാഗം മാധ്യമങ്ങളെയും പൊതുജനങ്ങളെയും അറിയിക്കും, ”അദ്ദേഹം പറഞ്ഞു. റെയില്‍വേ ട്രാക്കുകളിലെ കയ്യേറ്റം നീക്കുന്നതിനും ഇരുവശങ്ങളിലും വേലികള്‍ സ്ഥാപിക്കുന്നതിനും ട്രെയിന്‍ സര്‍വീസിന് സംസ്ഥാന സര്‍ക്കാരിന്റെ പിന്തുണ ആവശ്യമാണെന്നും റെയില്‍വേ വൃത്തങ്ങള്‍ അവകാശപ്പെട്ടു.
ബംഗാളിലെ രണ്ടാമത്തെ വന്ദേ ഭാരത് ട്രെയിന്‍ ബുധനാഴ്ച വൈകിയാണ് ചെന്നൈയിലെ ഫാക്ടറിയില്‍ നിന്ന് ഹൗറ സ്റ്റേഷനില്‍ എത്തിയത്. സത്രഗഞ്ചി കോച്ചിംഗ് കോംപ്ലക്‌സിലാണ് ഇത് പാര്‍ക്ക് ചെയ്തിരുന്നത്. ഹൗറയെയും ന്യൂ ജല്‍പായ്ഗുരിയെയും ബന്ധിപ്പിക്കുന്ന ബംഗാളിലെ ആദ്യ വന്ദേ ഭാരത് എക്സ്പ്രസ് ഡിസംബര്‍ 30ന് പ്രധാനമന്ത്രി നരേന്ദ്ര മോദി ഫ്‌ളാഗ് ഓഫ് ചെയ്തിരുന്നു